വേഗതയുടെ ക്രോം ബൌസറുമായി ഗൂഗിള്‍

എന്നും പുത്തന്‍ സേവനങ്ങള്‍ നല്‍കികൊണ്ട് നമ്മെ അമ്പരപ്പിച്ചുകൊണ്ടിരിക്കുകയാണ് ഇന്‍റര്‍നെറ്റ് ഭീമന്‍ ഗൂഗിള്‍. ഇന്‍റര്‍നെറ്റ് എക്സ്പ്ലോളര്‍ രംഗത്ത് വിപ്ലവം സൃഷ്ടിച്ച ഗൂഗിള്‍ ക്രോമിന്‍റെ പുതിയ ബീറ്റാപതിപ്പ് ചൊവ്വാഴ്ച പുറത്തിറക്കി.

മുന്‍‌പതിപ്പിനുണ്ടായിരുന്ന കോട്ടങ്ങള്‍ പരിഹരിച്ചാണ് പുതിയത് ഇറക്കിയിരിക്കുന്നത്.

മുഴുവന്‍ പേജ് സൂം ചെയ്യാന്‍ കഴിയുന്ന പുതിയ ക്രോം ബ്രൌസര്‍ വേഗതയുടെ കാര്യത്തില്‍ ഏറെ മുന്നിലാണ്. ഓട്ടോ ഫില്‍ സംവിധാനമുള്ള പുതിയ പതിപ്പില്‍ ഓട്ടോസ്ക്രോള്‍ സേവനവും ഉള്‍പ്പെടുത്തിയിട്ടുണ്ട്.

പുതിയ ക്രോം പതിപ്പിന്‍റെ ഏറ്റവും വലിയ പ്രത്യേകത വേഗതയാണ്. പുതിയ ബീറ്റാ ക്രോമിന് മുന്‍ പതിപ്പിനേക്കാള്‍ ഇരട്ടിവേഗതയുണ്ടെന്നാണ് ഗൂഗിള്‍ വക്താവ് ബ്രെയാന്‍ റകോസ്കി അവകാശപ്പെടുന്നത്.

സൌജന്യ മ്യൂസിക്കുമായി വോഡാഫോണ്‍

സെല്‍ഫോണ്‍ വിപണിയിലെ പ്രമുഖ കമ്പനിയായ വോഡാഫോണ്‍ സൌജന്യ മ്യൂസിക് ഓഫറുമായി രംഗത്ത്. ഇതിനാ‍യി ബ്രിട്ടണിലെ മൂന്ന് മ്യൂസിക് കമ്പനികളുമായി വോഡാഫോണ്‍ ധാരണയിലെത്തിയിട്ടുണ്ട്. ഡി ആര്‍ എം സൌജന്യ മ്യൂസിക് സേവനം വോഡാഫോണിന്‍റെ എല്ലാ വരിക്കാര്‍ക്കും ലഭിക്കും.

യൂനിവേഴ്സല്‍ മ്യൂസിക് ഗ്രൂപ്പ്, സോണി ബി എം ജി, ഇ എം ഐ എന്നീ മൂന്ന് മ്യൂസിക് നിര്‍മ്മാണ കമ്പനികളുമായാണ് വോഡാഫോണ്‍ കരാറിലെത്തിയിരിക്കുന്നത്. ഇതിലൂടെ ദശലക്ഷ കണക്കിന് മ്യൂസിക്കുകള്‍ ഡൌണ്‍ലോഡ് ചെയ്യാന്‍ കഴിയും.

രജിസ്റ്റര്‍ ചെയ്ത ഏതൊരു വോഡാഫോണ്‍ ഉപഭോക്താവിനും ഡി ആര്‍ എം സൌജന്യ മ്യൂസികുകള്‍ ഫോണിലേക്കോ പിസിയിലേക്കോ ഡൌണ്‍ലോഡ് ചെയ്യാവുന്നതാണ്. ഏതു തരത്തിലുള്ള ഡിവൈസുകളിലും ഈ മ്യൂസിക്കുകള്‍ പ്രവര്‍ത്തിക്കുമെന്നതും ശ്രദ്ധേയമാണ്. അതേസമയം,

മറ്റൊരു മ്യൂസിക് കമ്പനിയായ വാര്‍ണര്‍ മ്യൂസിക് ഗ്രൂപ്പുമായി വോഡാഫോണ്‍ ചര്‍ച്ച നടത്തുന്നുണ്ട്. സെല്‍ഫോണ്‍ നിര്‍മ്മാണ കമ്പനിയായ നോകിയ നേരത്തെ തന്നെ ഇത്തരമൊരു സൌജന്യ മ്യൂസിക് സേവനം തുടങ്ങിയിരുന്നു

ഫേസ് ബുക്ക് ഇനി അറബിയിലും

പ്രമുഖ സോഷ്യല്‍ നെറ്റ്വര്‍ക്ക് വെബ്‌സൈറ്റായ ഫേസ്ബുക്ക് അറബി, ഹീബ്രു പതിപ്പുകള്‍ കൂടി തുടങ്ങുന്നു. നിലവില്‍ നാല്‍‌പതോളം ഭാഷകളില്‍ ലഭ്യമായ ഫേസ്ബുക്ക് ചുരുങ്ങിയത് 60 ഭാഷകളിലെങ്കിലും ലഭ്യമാക്കാനാണ് ഫേസ്ബുക്ക് എഞ്ചിനീയര്‍മാര്‍ ലക്‍ഷ്യമിടുന്നത്. ലോകത്തെ എല്ലാ ഭാഷകളിലും ഫേസ്ബുക്ക് പേജുകള്‍ നിര്‍മ്മിക്കാന്‍ തങ്ങള്‍ ആഗ്രഹിക്കുന്നതായി കാലിഫോര്‍നിയ കേന്ദ്രമായി പ്രവര്‍ത്തിക്കുന്ന ഫേസ്ബുക്ക് അധികൃതര്‍ അറിയിച്ചു. എന്നാല്‍ ഇംഗ്ലീഷില്‍ ലഭിക്കുന്ന ഭംഗി മറ്റു ഭാഷകളിലെ പേജുകള്‍ക്ക് ലഭിക്കുന്നില്ലെന്നും പരാതിയുണ്ട്. അതേസമയം, മറ്റു ഭാഷകളിലെ പേജുകള്‍ സംബന്ധിച്ച് നിരവധി സാങ്കേതിക, നിയമ പ്രശ്നങ്ങള്‍ ഉണ്ടെന്ന് ഫേസ്ബുക്ക് അധികൃതര്‍ തന്നെ സമ്മതിക്കുന്നുണ്ട്. ജനപ്രിയ സോഷ്യല്‍ നെറ്റ്വര്‍ക്കിംഗ് സൈറ്റായ ഫേസ്ബുക്കിന് ലോകത്ത് മൊത്തത്തില്‍ 175 ദശലക്ഷം അംഗങ്ങളാണ് ഉള്ളത്.

ഐ ഫോണ്‍ ജനമധ്യത്തില്‍ “സ്മാര്‍ട്ട്”

ലോകത്തെ പ്രമുഖ സെല്‍ഫോണ്‍ നിര്‍മ്മാതാക്കളായ ആപ്പിളിന്‍റെ ഐഫോണിന് പ്രിയമേറുന്നു. കഴിഞ്ഞ വര്‍ഷത്തെ കണക്കുകള്‍ പ്രാ‍കാരം ആപ്പിള്‍ സ്മാര്‍ട്ട് ഫോണുകള്‍ വന്‍ വില്‍‌പനയുമാണ് മുന്നേറുന്നത്. ഐഫോണിന് തൊട്ടു പിന്നാലെ റിം, എച്ച് ടി സി, സാംസങ് എന്നീ കമ്പനികളുടെ സ്മാര്‍ട്ട് ഫോണുകളും മുന്നേറ്റത്തിലാണ്.

2008ഡിസംബറില്‍ അവസാനിച്ച കണക്കുകള്‍ പ്രകാരം ആപ്പിള്‍ സ്മാര്‍ട്ട് ഫോണുകളുടെ വില്‍‌പന 245.7 ശതമാനം വര്‍ധിച്ചു. ഇക്കാലയളവില്‍ 11.417 ദശലക്ഷം സെറ്റുകളാണ് വില്‍‌പന നടന്നത്. ആപ്പിള്‍ സ്മാര്‍ട്ട് ഫോണുകള്‍ വര്‍ഷാവര്‍ഷം വില്‍പന 111.6 ശതമനം വര്‍ധിച്ച് ഏകദേശം 4.079 ദശലക്ഷം സെറ്റുകള്‍ വില്‍ക്കുന്നു എന്നാണ് കണക്കുകള്‍ വ്യക്തമാക്കുന്നത്.

റിസര്‍ച്ച് ഇന്‍ മോഷന്‍ കമ്പനിയുടെ ജനപ്രിയ സെറ്റായ ബ്ലാക്ക് ബറി വില്‍പന 96.7 ശതമാനം വര്‍ധനവാണ് രേഖപ്പെടുത്തിയിരിക്കുന്നത്. വര്‍ഷാവര്‍ഷം 7.4 ദശലക്ഷം റിം സെറ്റുകള്‍ വില്‍‌പന നടക്കുന്നുണ്ട്. അതേസമയം, സാംസങ് ഈ രംഗത്ത് വന്‍ മുന്നേറ്റമാണ് നടത്തിക്കൊണ്ടിരിക്കുന്നത്. വര്‍ഷവും 138 ശതമാന വര്‍ധനവോടെ 1.6 ദശലക്ഷം സാംസങ് സെറ്റുകളാണ് വില്‍‌പന നടക്കുന്നത്.

മൂന്ന് സെക്കന്‍റിനുള്ളില്‍ ബാറ്ററി ചാര്‍ജിംഗ്

മൂന്ന് സെക്കന്‍റിനുള്ളില്‍ ബാറ്ററി റീചാര്‍ജ് ചെയ്യാന്‍ കഴിയുന്ന ഒരു കാലം വരുന്നു. എം ഐ ടിയിലെ ഗവേഷകരാണ് ഇത്തരമൊരു ബാറ്ററി നിര്‍മ്മിക്കാന്‍ പോകുന്നതെന്നാണ് റിപ്പോര്‍ട്ട്.

ലിഥിയം അയോണില്‍ പ്രവര്‍ത്തിക്കുന്ന ബാറ്ററികളായിരിക്കും ഇത്രയും വേഗത്തില്‍ ചാര്‍ജ് ചെയ്യാന്‍ കഴിയുക. അതേസമയം, മറ്റു ബാറ്ററികളില്‍ ഉപയോഗിക്കുന്ന സാമഗ്രികള്‍ക്കുള്ള ചെലവ് മാത്രമെ പുതിയ ബാറ്ററി നിര്‍മ്മാണത്തിനും വരുവെന്നാണ് ഗവേഷകര്‍ അവകാശപ്പെടുന്നത്.

അടുത്ത രണ്ട് വര്‍ഷത്തിനുള്ളില്‍ ഇത്തരം ബാറ്ററികള്‍ വിപണിയില്‍ സജീവമായേക്കും. കേംബ്രിഡ്ജ് മസാച്ചുറ്റസ് ഇന്‍സ്റ്റിറ്റൂട്ട് ഓഫ് ടെക്നോളജിയിലെ ഗവേഷകരായ ബെയുന്‍‌ഗൂ കാങ്ങും ഗെര്‍ബ്രാന്‍ഡ് സിഡറും ചേര്‍ന്നാണ് ഇതിന് തുടക്കമിട്ടത്.

ഇലക്ട്രിക് കാറുകള്‍, സെല്‍ഫോണ്‍, ലാപ്ടോപ് എന്നിവയ്ക്ക് ഇത്തരം ബാറ്ററികളുടെ സഹായം വളരെ വലുതായിരിക്കും.

ഗൂഗിള്‍ എര്‍ത്ത് കള്ളന്മാരെ സഹായിക്കുന്നു

ഗൂഗിള്‍ എര്‍ത്ത് കുറ്റവാളിള്‍ക്ക് സഹായകമാകുന്നതായി പരാതി. ലണടനില്‍ ഈയിടെയുണ്ടായ ഒരു മോഷണസംഭവമാണ് ഗൂഗിള്‍ എര്‍ത്തിനെതിരെയുള്ള പരാതിയുടെ അടിസ്ഥാനം.

ഗൂഗിള്‍ എര്‍ത്തിന്‍റെ സഹായത്തോടെ മോഷ്ടാടാവ് തട്ടിയെടുത്തത് ഒരു ലക്ഷം പൌണ്ടാണ്. മോഷണം നടത്തേണ്ട കെട്ടിടത്തിന്‍റെ സ്ഥാനം ഗൂഗിള്‍ എര്‍ത്തിന്‍റെ സഹായത്തോടെ കണ്ടെത്തുകയായിരുന്നു. ലണ്ടനിലെ ടോം ബെര്‍ജ് എന്ന മോഷ്ടാവാണ് നൂതന സാങ്കേതിക വിദ്യയുടെ സഹായത്തോടെ ഇത്രയും വലിയൊരു മോഷണം നടത്തിയത്.

ലോകത്തിലെ പ്രധാനപ്പെട്ട മിക്ക നഗരങ്ങളുടെയും മികവാര്‍ന്ന ചിത്രങ്ങള്‍ ഗൂഗിള്‍ എര്‍ത്തില്‍ ലഭ്യമാണ്. സൌത്ത് ലണ്ടനിലെ സ്കൂളുകള്‍, ക്രിസ്ത്യന്‍ പള്ളികള്‍, മ്യൂസിയങ്ങള്‍ തുടങ്ങീ നിരവധി കെട്ടിടങ്ങളില്‍ ഇയാള്‍ മോഷണം നടത്തി. ആറു മാസത്തെ കഠിനപ്രയത്നം കൊണ്ടാണ് ഇത്രയും വലിയ മോഷണം നടത്താനായതെന്ന് ബെര്‍ജ് പറഞ്ഞു. അതേസമയം, മോഷണം സ്ഥിരജോലിയാക്കിയ ബെര്‍ജിനെ കോടതി എട്ട് മാസത്തെ കഠിനത്തടവിന് ശിക്ഷിക്കുകയും ചെയ്തു.